سیالکوٹ۔9دسمبر (اے پی پی):وزیراعظم عمران خان آکھیے جو حکومت صنعتی سرگرمیاں دے ودھارے ،کاروباری برادری کوں سہولتاں ، پرے علاقیں دی ترقی ، لوکاں کوں غربت اچوں کڈھݨ تے ودھ ݙتی ہوئی اے ، کاروباری برادری دے ایف بی آر، سٹیٹ بینک اتے ݙوجھے محکمیں متعلق مسئلے حل کریسوں ، عوامی مسئلے حل کرݨ کیتے موثر بلدیاتی نظام گھن آںدے پیوں ،کورونا وائر س دی وبا دی صورتحال اچ معاشی سرگرمیاں جاری رکھݨ اہم چیلنج ہئی، حکومت پکے اقدامات توں جاری کھاتیں دے گھاٹے تے قابو پاتے ، کورونا وائرس دی وبا دی پہلی لہر اچ مکمل لاک ڈائون دا مطالبہ کرݨ آلی اپوزیشن اڄ جلسے کریندی پئی اے ،کورونا توں بچݨ کیتے احتیاطی تدابیر تے عملدرآمد ضروری اے، عوام ماسک پاوم تے حفاظتی تدابیر تے عمل کرن ، صحیح معنے اچ احتیاطی تدابیر اختیار نہ کیتیاں ڳیاں توں موسم پالے اچ اوکھ تھیسی ۔اے ڳالھ انھاں بدھ کوں سیالکوٹ اچ فضائی کمپنی ایئر سیال دے افتتاح دے بعد کاروباری برادری توں خطاب کریندے ہوئیں آکھی اے۔ وزیراعظم عمران خان آکھیے جو ملکی ترقی اچ سیالکوٹ دی بزنس کمیونٹی دا اہم کردار اے۔ مستقبل قریب اچ سیالکوٹ برآمدی سرگرمیاں دا مرکز ہوسی ۔انھاں کوں مستقبل اچ اپݨی ایئر لائن دی ضرورت پووݨی ہئی ، ایں کیتے انھاں اتھاں پہلے ھک شاندار ایئر پورٹ اتے ول اپݨی ایئر لائن بݨائی اے کیوں کون کاروباری طبقہ بہتر طریقے نال جاݨدے جو او ائیر لائن کیویں چل سڳدی اے ۔ ایئر سیال دے آغاز توں پی آئی اے اتے ٻئی فضائی کپنیاں دے نال مقابلے دی فضا پیدا تھیسی تے مسافراں کوں سہولتاں مل ویسن ۔
