اسلام آباد۔24مارچ(اے پی پی)وفاقی وزیر اطلاعات و نشریات چوہدری فواد حسین آکھیے جو شطرنج دا جیڑھا کھیݙ اپوزیشن شروع کیتے اوکوں اساں آن مکیسوں، 27 مارچ کوں اسلام آباد اچ تاریخی جلسہ تھیسی اتے حکومتی اتحادی کتھائیں نئیں ویندے پئے، سپریم کورٹ دے جج صاحبان قابل احترام ہین، ن لیگ ولوں بینچ دے خلاف مہم دی مذمت کریندے ہیں، بار ایسوسی ایشن کہیں سیاسی جماعت دی سبسڈری نہ ٻمے، ملک دیاں ساریاں بار کونسلاں سپریم کورٹ بار دے کڄھ لوکاں دے اینڄھے رویے دا نوٹس ڳھن تے محاسبہ کرݨا چاہیدے۔ وفاقی وزیر حماد اظہر دے کٹھے سپریم کورٹ دے باہرو میڈیا نال الیندے وفاقی وزیر اطلاعات آکھیا جو ن لیگ سوشل میڈیا تے عدالتی بنچ دے خلاف قابل مذمت مہم شروع کیتی ہوئی اے، ساکوں سپریم کورٹ تے پورا اعتماد اے، امید اے معاملات آئین و قانون دے مطابق توڑ پڄسن۔ انہاں آکھیا جو بطور رکن سپریم کورٹ بار ایسوسی ایشن میݙے سپریم کورٹ بار دی باڈی تے شدید تحفظات ہین، پورے جڳ اچ بار ایسوسی ایشناں سیاسی معاملات توں انڄھ راہندن بھل اتھاں بار ایسوسی ایشن آپ ہک سیاسی جماعت نال رل ڳئی اے، بار دے ہک ݙو لوکاں پوری تنظیم کوں یرغمال ٻݨایا ہوئے، وکلاء بار ایسوسی ایشن دی ایں قیادت نال نفرت ݙکھائی اے اتے ایندے تے ٻیا وی آواز چیسی۔ انہاں آکھیا جو پی ٹی آئی 27 مارچ کوں بھرپور جلسہ کریسی بھل حالی تئیں ن لیگ جلسے دی کوئی درخواست نئیں ݙتی، لڳدے جو اپوزیشن اپݨا پروگرام بدل ݙتے۔
شطرنج دا جیڑھا کھیݙ اپوزیشن شروع کیتے اوکوں مکیسوں اساں، ن لیگ دے سپریم کورٹ دے بینچ دے خلاف پروپیگنڈے دی مذمت کریندے ہیں، چوہدری فواد حسین
مضمون کا ماخذ : سشی ایکسپریس
متعلقہ مضامین
