اسلام آباد۔5فروری (اے پی پی):صدرمملکت ڈاکٹرعارف علوی آکھیے جو کشمیر دا جھیڑا حل کیتے بغیر پاک بھارت تعلقات بہتر نی تھی سڳدے تے نہ ہی خطے اچ پائیدار امن دا قیام یقینی بݨایا ونڄ سڳدے، عالمی برادری بھارت کوں مقبوضہ کشمیر اچ کشمیریاں دی نسل کشی اتے آبادی دا تناسب تبدیل کرݨ دیاں کوششاں توں روکے ، کشمیر صرف علاقے اتے آبادی دا نی ہݨ اصولاں دا معاملہ اے ۔ اے ڳالھ انہاں مظفر آباد اچ جمعے کوں آزاد جموں وکشمیر قانون ساز اسمبلی دے اجلاس توں خطاب کریندے ہوئیں آکھی اے ۔ انہاں آکھیے جو اڄ کشمیریاں دے نال یکجہتی دا اظہار کریندوں ، مقبوضہ کشمیر دے عوام گزریل ستر سال توں ودھ عرصے توں آپݨے حق خود ارادیت گھنݨ کیتے مسلسل قربانیاں ݙیندے پئن ، کشمیر دے معاملے تے پاکستانی سیاسی قیادت ہمیشہ یکجہتی دا مظاہرہ کیتے ۔ انہاں آکھیے جو پاکستان دی ریاست دے موقف توں کشمیر دے عوام دیاں امیداں جڑیاں ہوئیاں ہن ، پاکستان کشمیریاں دے نال نال بھارت اچ مسلماناں نال تھیوݨ آلے ظلم دے خلاف آواز چاتی اے
