پاکستان بیت المال یتیم ٻالاں کوں رہائش، تریمتیں کوں بااختیار بݨاوݨ اتے غریباں کوں علاج معالجہ سودھا مختلف سہولتاں ݙیندا پئے، رپورٹ

رپورٹ: جنید ملک

اسلام آباد۔27نومبر(اے پی پی)وزیراعظم عمران خان دے ریاست مدینہ دے خواب کوں حقیقت ݙیوݨ کیتے پاکستان بیت المال یتیم ٻالاں کیتے دارالاحساس، چائلڈ لیبر مکاوݨ دے مراکز اتے وومن ایمپاورمنٹ سینٹرز سودھا معاشرے دے غریب لوکاں کوں علاج معالجہ ݙیندا پئے۔ سرکاری ذرائع موجب پورے ملک دے ہر دارالاحساس مرکز اچ 4 توں 6 سال تئیں دی عمر دے 100 ٻال راہندن جھتھاں ٻالاں کوں ہک فیملی یونٹ اچ مفت فرنشڈ رہائش، مفت متوازن غذا جیویں ناشتہ، ݙوپاھر اتے رات دا کھاوݨ، شہر دے بہترین سکولاں اچ میٹرک اتے ایندے اڳو دی تعلیم، مفت یونیفارم، کتب اتے اسٹیشنری، موسم سرما اتے موسم گرما دا لباس، سرکاری ہسپتالاں اچ طبی سہولت، اسکلز ڈویلپمنٹ، مفت لانڈری خدمات، نماز دی سہولت اتے دینی تعلیم ݙتی ویندی پئی اے، تشدد اتے بدسلوکی دے شکار ٻالاں کوں مشاورت اتے قانونی امداد وی ݙتی ویندی اے، پچھلے مالی سال پورے ملک اچ 1730 نویں یتیم ٻالاں کوں دارالاحساس اچ رجسٹر کیتا ڳئے۔ پاکستان بیت المال اچ انفرادی مالی معاونت (آئی ایف اے) پروگرام دے تحت غریب، بیوہ اتے بے سہارا تریمتیں، یتیم اتے معذور لوکاں دی عمومی امداد، تعلیم، طبی علاج اتے بحالی دی مدد ݙتی ویندی پئی اے تاں جو غریب لوکاں دا ہتھ ونݙایا ونڄ سڳے اتے انہاں کوں مالی، طبی و سماجی مدد ݙتی ونڄے، ایندے اچ تعلیمی و تکنیکی وظائف وی شامل اے۔ پچھلے سال 21618 غریب مریضاں کوں مفت علاج ݙتا ڳئے جیندے تے 2727 ملین روپے خرچ تھین ڄݙاں جو 36.28 ملین روپے دے خرچ نال 18141 مستحق مریضاں دی اکھیں دی سرجری کیتی ڳئی۔ ہونہار طالب علماں کوں پچھلے مالی سال 155 ملین روپے ݙتے ڳین جیندے نال 5683 طالب علم مستفید تھین اتے ہݨ تئیں 51 ٻالاں کوں”کوکلئیر امپلانٹ“ ݙے تے ٻولݨ اتے سݨݨ دے قابل بݨایا ڳئے جیندے تے 46.22 ملین روپے لڳین۔ انٹرنیشنل لیبر آرگنائزیشن (آئی ایل او) چائلڈ لیبر مکاوݨ دے پروگرام نال 1996 اچ ہک سروے کیتے جیندے اچ پاکستان اچ پنج توں 14 سال دی عمر دے 3.3 ملین ٻالاں کولو جبری مشقت گھنݨ دا انکشاف کیتا ڳئے۔ ایں سانڳے چائلڈ لیبر بارے قومی پالیسی اتے ایکشن پلان آف چائلڈ لیبر اچ ٻالاں توں مشقت تیکھے مکاوݨ تے توجہ ݙتی ڳئی، ایں سانڳے پاکستان بیت المال اسکولاں اچ مختلف مراکز اچ 5 توں 14 سال تئیں دی عمر دے ٻالاں کوں داخل کیتا ویندے جیکوں مفت تعلیم، لباس، جتی اتے وظائف ملدن۔ ایں مقصد کیتے پورے ملک اچ پاکستان بیت المال ولوں 159 چائلڈ لیبرمکاوݨ دے مراکز ہین جیندے اچوں پنجاب اچ 73 اتے اسلام آباد اچ 11مراکز ہین، ٻالاں کوں جبری مشقت توں بچاوݨ کیتے مفت پرائمری تعلیم وی ݙتی ویندی اے جتھاں 17871 طلبہ پڑھدے پین، ڄݙاں جو سال 2019-20ء اچ 18519 ٻال رجسٹر کیتے ڳین جتھو ہݨ تئیں 38059 ٻال علم حاصل کرچکین،پچھلے سال ایں منصوبے تے 712ملین روپے خرچ تھین۔ پاکستان بیت المال ملک اچ 155 ویمن ایمپاورمنٹ سنٹر بݨائن جیڑھے 1995ء توں کم کریندے پین، انہاں اچ بیوائیں، یتیماں، غریب چھوہریں کوں ڈرافٹنگ، کٹنگ، سلائی، کڑھائی، ہتھ اتے مشین نال ایمبرائیڈری سودھا مختلف مہارتاں اچ مفت تربیت ݙتی ویندی اے، پاکستان بیت المال ہر ضلع اچ ہک ووکیشنل دستکاری سکول وی بݨیسی، ایں ویلکھے انہاں سکولاں دی تعداد 155 اے جیندے اچ پنجاب اچ 64، اسلام آباد، آزاد کشمیر اتے شمالی علاقیاں اچ 11 سکول شامل ہین۔ ڳھٹ آمدن آلے طبقات دیاں تریمتیں اتے چھوہریں ݙو شفٹان اچ تربیت ݙتی ویندی اے۔ سال 2019-20ء اچ 638 ملین روپے نال 30 ہزار تریمتیں کوں پیشہ وارانہ تربیت فراہم ݙتی ڳئی۔ اتھو پڑھ تے فارغ تھیوݨ آلیاں تریمتیں کوں پاکستان تخفیف غربت فنڈ توں ہک لکھ روپے تئیں بلاسود قرضے ݙتے ویسن تاں جو او اپݨے پیریں تے کھڑیاں تھی سڳن، ایں ویلھے 13322 تریمتیں زیر تربیت ہین ڄݙاں جو ہݨ تئیں 135220 خواتین تربیت مکمل کر چکین۔ایں منصوبے دے تحت اگلے چار سالاں اچ 62400 تریمتیں کوں باعزت اتے باوقار جیوݨ کیتے خود کفیل بݨایا ویسی۔